13/09/2017
13:52
687
| A A A
Federasiya rəsmisi: "Yığmamız mükafatçılar sırasında yer almağa qadirdir"

Azərbaycan Voleybol Federasiyasının (AVF) prezidenti Cavid Qurbanov qadınlardan ibarət milli komanda ilə görüşüb. Goal.az "Report"a istinadən xəbər verir ki, AVF rəhbəri öncə təlim-məşq toplanışından qayıdan komandanın hazırkı durumu ilə maraqlanıb.

O bildirib ki, Azərbaycan dövləti sentyabrın 22-də start götürəcək qadın voleybolçular arasında Avropa çempionatını ən yüksək səviyyədə təşkil etməyə çalışacaq. Qurbanov komandanın medalçılar arasına düşəcəyinə də inam ifadə edib.

Federasiya prezidentinin sözlərinə görə, Faiq Qarayevin baş məşqçisi olduğu yığma mükafatçılar sırasında yer almaq gücündədir: “Bu, sizinlə Sloveniyadakı təlim-məşq toplanışından qayıtdıqdan sonra ilk görüşümüzdür. Komandaya inanıram, güclüdür. Azərbaycan üçün Avropa çempionatına ev sahibliyi etmək böyük uğurdur. Biz də çalışırıq ki, yarışı yüksək səviyyədə təşkil edək. Amma əsas yük sizin üzərinizdədir. Nəticə qazanmağa çalışmaq lazımdır. Yığmamız mükafatçılar sırasında yer almağa qadirdir. Komandada Faiq Qarayev kimi böyük mütəxəssis olduğundan, bunu bacaracağınıza inanıram”.

AVF-nin vitse-prezidenti, eyni zamanda yığmanın baş məşqçisi Faiq Qarayev komandanın hazırkı durumundan danışıb. O bildirib ki, Maribordakı hazırlığın və yoxlama oyunlarının milliyə böyük faydası olub: “Sloveniyada uzun müddət təlim-məşq toplanışı keçdik. Komandamızda bəzi zədəli oyunçular vardı. Onların formaya düşməsi üçün xüsusi proqram tərtib etdik. Bizim üçün çox böyük məsuliyyətdir ki, Azərbaycan Avropa çempionatına ev sahibliyi edir. Biz də yaxşı nəticə əldə etməyə çalışacağıq. Qarşıda komandamızı yoxlama matçları gözləyir. Komandanın yaxşı nəticə əldə etməsi üçün əlimdən gələni edəcəyəm”.

Qeyd edək ki, Avro-2017 Azərbaycan və Gürcüstanda təşkil olunacaq. Azərbaycan millisi A qrupunda Polşa, Almaniya və Macarıstanla mübarizə aparacaq. 

Ən baxımlı liqa hansıdır?

İNGİLTƏRƏ P.L
%
İSPANİYA L.L
%
AZƏRBAYCAN P.L
%
TÜRKİYƏ S.L
%
ALMANİYA B.L
%
FRANSA L.1
%
İTALİYA A.S
%
RUSİYA P.L
%
66369 səs